Кăçалхи хĕллехи спорт ăмăтăвĕсен сезонĕ час уçăлаймарĕ. Сăлтавĕ паллă – Çĕнĕ çулччен кăпăшка юр пулманпа пĕрех. Çапла вара йĕлтĕр çине кăрлач уйăхĕнче кăна тăма майсем пулчĕç.

     Кăрлач уйăхĕн 29-мĕшĕнче шкулăн йĕлтĕр трасси çинче 1-11 классем хушшинче эстафета иртрĕ. «Сывлăх кунĕ» 1-4 классем хушшинчи ăмăртупа пуçланчĕ. Кашни класс 4 хĕр ача тата 4 арçын ача тăратрĕ. Çĕнтерӳçĕсем: 1 вырăн - 4 классенче, 2-мĕш – 3 класра, 3-мĕш – 2 класра вĕненекенсенче. 1 классем вара çĕнтерме ăнтăлнăшăн тав хучĕ илме тивĕç пулчĕç. Ку кăна та мар. Класс ертӳçисемпе ачасен ашшĕ-амăшĕсем те йĕлтĕр çине тăчĕç, хăйсен сывлăхне çирĕплетрĕç.

      6-мĕш урок хыççăн 5-8, 9-11-мĕш классем ăмăртрĕç. Ку чи интереслĕ пай пулчĕ, мĕншĕн тесен вăтам тата аслă классен хушшинче 8 Б класс 1-мĕш вырăн йышăнчĕ, 6 А класс – 2-мĕш вырăн, 10 класс вара 3-мĕш вырăна кăна тивĕçрĕ. Тĕлĕнмелле мар-и?